ભારત અને ભારતીયને સતત હલકો ચિતરવાની ગંદી માનસિકતા


હમણાં હું મારા એક પ્રોજેક્ટમાં વ્યસ્ત હોવાને કારણે મારું બ્લોગમાં લખવાનું બંધ થઇ ગયું છે ઘણીવાર વિચારું કે મહિનામાં એકાદ બે લેખ તો લખું પણ સાતત્ય જળવાતું નથી પણ ક્યારેક અન્ય બ્લોગમાં કોઈ કારણસર આપેલ પ્રતિભાવ ત્યાં મોડરેટ ના થઇ શકે ત્યારે બ્લોગમાં રાખું છુ.

હમણાં મારા આવા જ પ્રતિભાવમાં એક વાચકની સરળ અને હૃદયને સ્પર્શી જાય તેવી કમેન્ટ આવી હતી.
એ કમેન્ટનો ભાવાર્થ એ છે કે આજકાલ અમને ભારતવાસીઓને ગમાર અને હલકા મગજના હોઈએ તેવા બતાવવાની એક રેસ ચાલી રહી છે અમારામાં હજારો બુરાઈ હશે પણ જેવા દેખાડવાનો પ્રયાસ થઇ રહ્યો છે તેવા સાવ અક્કલમઠ્ઠા કે હલકા પણ નથી.

માતા જયારે ભૂલ બતાવવા કાન ખેંચે ત્યારે તેમાં માતાનો પ્રેમ અને ચિંતા હોય છે તે બાળક સમજી જાય છે અને સતત ઉતારી પાડવા માટે કાન ખેંચ્યે રાખે તો નાનું બાળક પણ સમજી જાય છે તો આપણે તો મોટા છીએ.
તમારા જેવું સમતોલ લખાણ વાંચી દિલને ટાઢક થાય છે.

અહી હું મારું લખાણ સારું છુ તેના માટે આ વાત નથી કરતી. પણ અભિવ્યક્તિની સ્વતંત્રતા અને હાથવગી ટેકનોલોજી મળવાથી અધૂરા ઘડાઓ માત્ર થોડી વાહવાહી અને લાઈક કમેન્ટ મેળવાવા માટે ભારતના લોકોની સંવેદના અને લાગણીઓની સાથે એક ભદ્દી મજાક કરી સતત ઉતારી પડવાની રમત રમી રહ્યા છે તેનું તેમને કોઈ ભાન નથી.

જગતના કોઈપણ મહાન વ્યક્તિએ કે મહાન વૈજ્ઞાનિકો કે ટેકનોલોજીના શોધકોએ પણ માનવીની સંવેદના અને લાગણીને વિજ્ઞાન અને ટેકનોલોજી કરતાં વધુ મહત્ત્વ આપ્યું છે માણસ સામાજિક રહેવા ટેવાયેલો છે અને એટલે જ સોશ્યલ મીડિયા અસ્તિત્વમાં આવ્યું છે ને સંવેદના વિના તો ટેકનોલોજી કે વિજ્ઞાન પણ પાંગળું બની જાય છે વિશ્વમાં સંવેદના જ પ્રથમ સ્થાને છે અને તે હશે તો જ વિજ્ઞાન અને ટેકનોલોજી રહેશે.

આટલી સાદી સમજ પણ આવા અધૂરા  ઘડાઓ પાસે નથી તેઓ માત્ર ગુગલ પરથી માહિતી ઉઠાવે છે કા તો પુરાણોમાંથી મનઘડત અર્થ કરી ભારતના લોકોને પછાત-દંભી સાબિત કરવામાં અને શબ્દોની રમત રમી લોકોને ઉતારી પડવાનું કાર્ય કરે છે અને પોતાને મહાન લેખક માને છે. આમેય થોડીઘણી ઉપરછલ્લી માહિતી મેળવનારા લોકો જજમેન્ટલ વધુ હોય દરેક બાબતમાં પોતાના જજમેન્ટ આપે. ઇન્ફોર્મ ડીસીઝન ના લઇ શકે.

ભારત બહાર કમાવા જતા કે ફરવા જતા લોકોમાં થોડાક આવા લોકો ઉપરછલ્લી માહિતી અને ચમકદમક જોઇને અંધ બની જાય છે સતત સરખામણી કરી અને ભારતના લોકોને સતત ઉતારી પાડવાની ચેષ્ટા કરતાં જોવા મળે છે હું જયારે પ્રથમ વખત લંડનમાં આવી ત્યારથી આજ સુધી હું કોઈપણ વસ્તુ કે સિસ્ટમ કે લોકોને જોયા પછી વિચારું અહી આવું છે તે અને મારા દેશમાં કેમ આવું છે તે વિષે સતત મનોમંથન કરું કયારેય એમ ના વિચારું કે આવું જ મારા દેશમાં હોવું જોઈએ અને તમે જો ચમકદમકથી અંજાયા વિના વિચારો તો તમને ખ્યાલ આવે કે સારું શું અને ખોટું શું?

મારા પતિ લંડનમાં પણ કોઈ ભારતીય લોકો ભારત વિષે ઘસાતું બોલે કે તરત જ કહે તમે છેલ્લે ભારત કયારે જોયું ? મીડિયા અને સમાચારોમાંથી અધુરી માહિતીથી ભારતને ના મૂલવો, ભલે આજે આપણે મહાન નથી કે ઘણી બાબતમાં પાછળ છીએ પણ આપણે ઘણું સારું પરિવર્તન અને વિકાસ કરી રહ્યા જ છીએ એમ વ્યવસ્થિત ચર્ચા કરે અને હું જ્યારે પણ ભારત આવતી હોઉં ત્યારે અચૂક કહે કે દેશની કોઈપણ વ્યક્તિને એવું લાગવું ના જોઈએ કે આપણે વિદેશમાં રહેવાથી ભારતના લોકોથી ઊંચા કે વિશેષ છીએ ઉપરથી એ લોકોને સતત ભારત વિષે માન રહે તેવું અને ભારતમાં પણ તેઓ સારી જિંદગી જીવે છે તે અહેસાસ કરાવજે અને ક્યારેક કોઈ બાબતમાં ચર્ચા થાય તો કોઈને ઉતારી પાડવાની ચર્ચા તો ના જ કરતી.

એવી જ રીતે મારા દીકરા સાથે આ વિષય પર ચર્ચા થાય તે સાચી માહિતીના અભ્યાસ અને ભારતમાં લોકોમાં આવતા બદલાવને જોઇને કહે કે અત્યારે ભારતનો દરેક વર્ગ આર્થિક રીતે સતત ઉપર આવી રહ્યો છે અને તેથી જ સમાજમાં તહેવારો અને ઉત્સવોનું પ્રમાણ વધુ દેખાય છે દરેક વ્યક્તિ  સારું જીવન જીવવાનો પ્રયાસ કરે છે. અને એમાં ખોટું પણ શું છે? સતત કચડાયેલો દબાયેલો સમાજ આર્થિક રીતે આગળ વધે ત્યારે થોડુક અંધાધૂધી જેવું કદાચ લાગે પણ ધીમેધીમે તેના પ્રમાણે નવી નીતિ, કાયદા બને તે માટે ધીરજની જરૂર છે અને તે દિશામાં કાર્ય થાય તે વિચારવાને બદલે સતત પછાત ગણવા વ્યવહારિક ના કહેવાય.

હું ક્યારેય પશ્ચિમી સંસ્કૃતિ, પશ્ચિમના લોકો કે તેમની ટેકનોલોજી-સિસ્ટમને ઉતરતી માનતી નથી કે તેમાં કોઈ દોષ છે એવું પણ નથી કહેવા માંગતી, પણ થોડે ઘણે અંશે જે આપણે ત્યાં છે તેવું બધે જ જોવા મળશે એટલેકે બધું જ બીજા દેશોનું સારું અને આપણું જ ખરાબ કે આપણે જ પછાત અને દંભી છીએ એવું નથી કાગડા બધે જ કાળા હોય છે.

અમે ચાર વર્ષથી લંડનમાં જ હતા પણ હમણાં થોડો સમય બર્મિઘહામમાં હતા લંડન એક મલ્ટીકલ્ચર શહેર છે ત્યાં મોટેભાગે બધા જ લોકો બહારથી આવેલ છે ત્યાની સ્થાનિક પ્રજા બહુ જ ઓછી દેખાય, હવે બધાજ બહારથી આવ્યા હોય ત્યાં તમને કોઈ ઓળખતું ના હોય તો તમે તમારી મરજીથી જેમ રહેવું હોય તેમ અને જેમ વર્તવું હોય તેમ વર્તો કોઈની આંખની શરમ જેવું ના હોય એટલે આપણે માનીએ કે આ લોકો કોઈ દંભ દેખાડો નથી કરતા એમ તો આપણે ત્યાં મુંબઈ જેવા મહાનગરોમાં પણ લોકો પોતાને મરજી પડે તેમ રહેતા હોય પણ નાના શહેરો કે ગ્રામ્ય વિસ્તારોમાં લોકો એકબીજાને ઓળખતા હોય એટલે શરમ કે ઢાંકપિછોડો હોય તે દંભ ના કહેવાય. અમને આજ ફરક લંડન અને બર્મિંગહામમાં જોવા મળતો લોકો ફેમિલી સાથે હોય બગીચાઓમાં છોકરાં અને છોકરીઓના ગ્રુપ અલગ જોવા મળે લંડનમાં જાહેરમાં કિસ કરતા કે એકબીજાને વળગીને કલાકો સુધી ઉભા રહેલા યુવક-યુવતી કે ટીનેજરો ઠેર ઠેર જોવા જયારે બર્મીગહામમાં પરિણીત કપલ પણ જાહેરમાં આમ જોવા ના મળે તો એ લોકો દંભી અને પછાત માનસિકતા ધરાવતા ના બની જાય.

હું બહાર નીકળી પડું લોકોની વચ્ચે જઈને તેમનો નજીકથી અભ્યાસ કરવાની કોશિશ કરું દરેકની ભાષા તો આવડે નહિ પરતું માનવીના ચહેરા કે માણસ વાંચતા આવડે અને આ રીતે સમજ કેળવીએ તો ક્યારેય તમને એમ નહિ લાગે કે આપણે દંભી છીએ ,હા ! અલગ જરૂર છીએ.

પશ્ચિમના દેશો વિકસિત દેશો છે આપણે વિકાસશીલ દેશમાં ગણાઈએ છીએ એમ ગણીએ કે વિકસીત દેશો એક સમૃદ્ધ ઉમરલાયક વ્યક્તિ છે જયારે ભારત હજુ કિશોરાવસ્થામાં છે હવે આ બે વ્યક્તિની સરખામણી શક્ય જ નથી બીજું એ કે વિવિધતા વિશાળ માત્રામાં છે.

હકારાત્મક રીતે લઈએ તો આજે દેશની પ્રગતિ થઇ રહી છે ઘણા બધા ક્ષેત્રોમાં અને બીજી રીતે કહીશ કે આ જ પેલી ઉતારી પાડવાની કે હલકા ચિતરવાની માનસિકતાનું કારણ છે. એક વ્યવસ્થિત ષડયંત્ર છે ઊંચાઈ પર પહોંચેલા ભારતની આર્થિક સમૃદ્ધિનો આંક જોઇને અચબિંત થઇ ગયા છે 2008 માં આવેલી વૈશ્વિક મંદીમાં ભારત અડીખમ ટકી રહ્યું અને વિકસિત દેશોના પાયા ડગી ગયા હતા ત્યાર પછી એક બાજુ વધુ વસ્તી હોવાથી મોટા માર્કેટ માટે ભારતનો ફાયદો ઉઠાવવો છે તેમનો માલ ભારતના બજારોમાં ઠાલવવો છે અને બીજી તરફ મીડિયામાં પગપેસારો કરી ભારતને સતત ખરાબ ચિતરવાની કોશિશ થઇ રહી છે ટૂંકમાં દબાયેલા રાખવા અને પછાત સાબિત કરવાની એક ચાલ છે જો તમે ઊંડાણઉર્વક વિચારશો તો આ બધી રમતનો ખ્યાલ આવશે.

હવે આવા ષડયંત્રમાં અમુક  જાણે અજાણે અને અમુક વ્યવસ્થિત રીતે ભાગ લઇ રહ્યા છે અમુક લોકો આ પછી પણ સ્વીકારશે નહિ કેમ કે તેમને ભારત પ્રત્યે કોઈ લાગણી નથી કે ભારતના લોકોની સંવેદના  વિષે પણ વિચારવાની જરૂર નથી લાગતી.

Advertisements

18 responses to “ભારત અને ભારતીયને સતત હલકો ચિતરવાની ગંદી માનસિકતા

  1. મારા બ્લૉગ નેટગુર્જરી https://jjkishor.wordpress.com/ પર તમારો આ લેખ જેમનો
    તેમ મુકવાની રજા આપશો ? – જુ.

    *– જુગલકીશોર. *
    –––––––––––––––––––––––
    *NET–ગુર્જરી : **http://jjkishor.wordpress.com/
    *
    *વેબગુર્જરી : http://webgurjari.in/ *

    Liked by 1 person

  2. મીતાબેનનો’ જનજાગરણ કરતો ભારત અને ભારતીયને ‘સતત હલકો ચિતરવાની ગંદી માનસિકતા ‘સુંદર લેખ અને તેને રી બ્લોગ કરવાની જુ’ભાઇને સહજતાથી આપેલ સંમ્મતિ
    બદલ ધન્યવાદ

    Liked by 1 person

    • પ્રજ્ઞા બેન આભાર
      આપ અને જુગલભાઈ જેવા અનુભવી અને વધુ સારું વાચન ધરાવતા લોકોને મારું લખાણ સારું લાગ્યું એ જ મારે માટે મહત્વનું છે અને જે પણ થોડું પણ લખું તેનાથી કોઈને હાની-દુઃખ ના પહોંચે તેનું ધ્યાન રાખવાની મને સમજ આવશે

      જુગલભાઈએ તો પરવાનગી માગવાની જ ના હોય તેઓ તો હક્કથી એમને યોગ્ય લાગે ત્યાં મૂકી શકે છે.

      Like

  3. Khub khub aabhar ben. Tamari vatu Jane amara jeva chetena gaamada ma reta samany manas na man vanchi ne lakhai hoy evi lage che. Hu pan thodak varas Dubai rahi aavelo. Majuri kari kamayo pan ghanu. E vat ni na nahi ke saravale BHARAT karata videsh ma kamani ne raheni kaheni vadhu sari che. Pan me Dubai kamani kari to same e lokone mate kam pan karyu ne. Toye aapane aapanane rotalo aapnar no aabhar manvo ja joie. mata karata masi vadhu vhali ganiye tya sudhi barabar pan garib mata ne bhikharan ganavie ane masi ne rajrani e to khali svartha ja thayo. Maa ni garibai ke badhali dur karava aapane shu kariyu ke kari sakie e ni vat thavi Joye. To videsh gaya ne be pandade thaya e lekhe lage.

    Hu mara fon ma gujrati lakhata shikhi jaish. Tya sushi AA angreji badal maf karajo. Sara’s Lakho cho lakhta rejo ben.

    Liked by 1 person

    • જેતાભાઇ આભાર તો મારે માનવાનો હોય આપનો
      આપ બહુ સરળ શબ્દોમાં ખુબ ઉંચી વાત લખી શકો છો

      માં કરતા માસી વધુ વ્હાલી ગણીએ ત્યાં સુધી ઠીક પણ માં ને ભિખારણ કહેવી અને માસીને રાજરાણી ગણવી તે તો સ્વાર્થ જ થયો- આ માટે મારી પાસે તો કોઈ શબ્દ જ નથી

      Like

    • મીતાબેનના બ્લોગ પર રીપ્લાય લખવો તે અયોગ્ય છે પણ તમે http://vishalon.net પરથી pramukh IME ડાઉનલોદ કરી ગુજરાતી run કરશો તો તમારુ આ લખાણ પણ ગુજરતીમાં જ લખાશે .

      Like

  4. શ્રી જુગલભાઈના બ્લોગ પરથી અહીં આવી પહોંચ્યો (હવે તો રીડરમાં તમારી પોસ્ટ મને મળી જ જશે). સરખા વિચારો જાણી આનંદ થયો. મોટાભાગના NRI ઓ એ ભારતને ખરાબ ચીતરવાનો ઠેકો લીધો છે. બુધ્ધીજીવીઓ (?) પણ ભારતીયતાને (એમના કમનસીબે ભારતીય હોવા છતાં !) અત્યંત હલકી કક્ષાએ મુકે છે. હમણા મેં ભુપેન્દ્રભાઈની પોસ્ટ પર (જો કે વિષય આપવા માટે ભુપેન્દ્રભાઈનો આભાર) મારા વિચારો મારા બ્લોગ પર મુક્યા છે. આપની બ્લોગ પોસ્ટ્સ ગમી

    Liked by 1 person

  5. જુગલકિશોરભાઈ, દીપકભાઈ, શકીલભાઈ, વિનોદભાઈ, ગોવિંદભાઈ, જગદીશભાઈ,પ્રજ્ઞાબેન,પ્રેમ પરખંદા અને NVPAR આપ સૌને લેખ ગમ્યો તે બદલ અભાર

    Like

  6. આદરણીય મિતાબહેન. નમસ્કાર.
    હું તો આદત પ્રમાણે લાંબા વેકેશન પર હતો ! (આદત ન પડે એ માટે વેકેશન ભોગવવાની આદત રાખી છે !) પણ એક ઉમદા મિત્રએ ફોન દ્વારા આપે મુકેલા આ (અને અગાઉના બે એક) લેખ વિશે જણાવ્યું, સંદર્ભ જણાવ્યો, અને વાચવા ભલામણ પણ કીધી (બોલો, ‘આપનો’ લેખ વાંચવા માટે ‘મને’ ભલામણ કરવાનું જોખમ ખેડવું એ નર્યો મિત્રપ્રેમ જ ને ! હું અહીંથી એનો જાહેર આભાર માનું છું).

    હાલ વધુ નથી લખતો. કેમ કે, જે કહેવા જેવું હતું તે આપે લેખમાં કહી જ દીધું છે. અને એ જે સ્ટાઇલથી કહેવાયું એ તો આપ સમા સિદ્ધહસ્ત, સ્વાનુભવી જ કહી શકે. આપનાં લખાણના વખાણ કરવા એ મૂજ પામરની લાયકાત બહારનું ગણાય. દેશભક્તિ કે દેશપ્રેમ વિશે મારા પણ થોડા અંગત વિચારો છે, જે ક્યારેક શેર કરીશ, પણ એ બધું હોવા સાથે જ આપણી ક્ષતિઓનો સ્વિકાર કરવો કે એનું અવલોકન કરવું એ પણ જરૂરી તો છે જ પણ…

    આપે ઉપર લખ્યું તેમ, કાન ખેંચનારની દાનત મહત્વની બાબત છે, અને આપને એ દાનત વિષયે જે ફીલ થયું હશે એવું મારા સમેત ઘણાં મિત્રોને ફીલ થતું હોવાનું જણાય છે. પણ આપણે ત્યાં કહેવત છે ને કે, ‘ગામને મોઢે ગરણાં ન બંધાય’ એમ સદભાવે કે દૂર્ભાવે વાત કરનારને રોકી ન શકાય પણ વાતની કાટ વાત વડે કરવાનો આપણો હક્ક તો વાપરી જ શકાય. આપે અને અન્ય ઘણાં મિત્રોએ એ હક્ક પણ વાપર્યો અને સત્ય તરફે પોતાની ફરજ બજાવી એનો આનંદ છે અને ધન્યવાદ તો ખરા જ. હું પણ હવે વેકેશન પૂર્ણ કરીને ફરી આપ સૌનો સાથ મેળવવા પ્રેરાયો છું (અને આપવખાણ કરતાં એમ કહું કે, વાઘને એની બોડમાંથી પૂંછડું ઝાલી બહાર કાઢવામાં નિમિત્ત આપ બન્યા છો ! તો અન્ય મિત્રોએ હવે મને સહન કરવો પડશે તેની જવાબદારી આપની રહેશે 🙂 )

    ઘણાં સમયે લખ્યું એટલે ઝાઝું લખાઇ ગયું, થોડું કરીને વાંચશો ! ધન્યવાદ.

    (ઉપર એક jetabhai નો પ્રતિભાવ છે એ મારી ધારણા પ્રમાણે જેઠાભાઈ ( જેઠાભાઈ ઓડેદરા, જેણે વિકિ પર આત્મકથા ચઢાવવામાં અમને સહયોગ કરેલો ) છે. જેને આપના અને આપણાં અન્ય કેટલાંક મિત્રોના લેખો વાંચવાના રવાડે મેં ચઢાવેલા. જો કે હમણા મારે તેનો સંપર્ક નથી થયો પણ હું પૂછીશ અને તેઓ પ્રતિભાવ આપવા જેટલા સમજદાર થયા એ બદલ આભાર પણ માનીશ.)

    Liked by 1 person

    • શ્રી અશોકભાઈ
      મારા લેખને વાંચવાની ભલામણ કરનાર આપના મિત્રનો તો હું પણ અભાર માનું છુ
      જયારે આવી રીતે વખાણ થાય ત્યારે હું વધુ સભાન થાઉં છુ મારાથી કોઈ ભૂલ ના થાય તે માટે અને સ્વાનુભવ વાત તો બરાબર પણ આપ જેવા બ્લોગ્મિત્રોના કારણે જ તો લખાણમાં સુધારો આવે છે
      આપની વાત સાચી છે આપણે આપણી ક્ષતિઓનો સ્વીકાર કરીને કોઈને રોકવા કરતા વાતની કાટ વાત વડે જ કરવાનો પ્રયાસ કરીએ
      આપના દેશપ્રેમ અને દેશ ભક્તિ વિશેના વિચારો માટે અને આપને સહન કરવા માટે અમે જવાબદાર રહેવા ખૂબ જ આતુર રહીશું

      આપનો આભાર

      Like

  7. તમે લખો છો :
    “….. અભિવ્યક્તિની સ્વતંત્રતા અને હાથવગી ટેકનોલોજી મળવાથી અધૂરા ઘડાઓ માત્ર થોડી વાહવાહી અને લાઈક કમેન્ટ મેળવાવા માટે ભારતના લોકોની સંવેદના અને લાગણીઓ ની સાથે એક ભદ્દી મજાક કરી સતત ઉતારી પડવાની રમત રમી રહ્યા છે તેનું તેમને કોઈ ભાન નથી.”

    આ વાત સાથે સહમત નથી. આવા અધૂરા ઘડા પોતાને (દોઢ)ડાહ્યા માનતા હોય છે અને એમને પુરતું ભાન હોય છે કે તેઓ શું અને શું કામ આવું કરી રહ્યાં છે. તેઓએ જાણી જોઇને જ આવો શોર્ટ કટ અપનાવે છે.
    તેઓ જ્યારે એમ કહે કે ‘પોતાના’ વિસ્તારને ‘ચોખ્ખા’ રાખવા માટે ગંદકી બતાવવી પડે પણ હકીકત એ હોય છે કે એ પોતાનો વિસ્તાર પોતે પહેલા જ નક્કી કરે લ્યે છે. તેઓ પોતાના ઘરની ગંદકી વિશે ચુપ રહેશે પણ પોતાના પડોશીની વાત પહેલી કરશે, એનાથી આગળ હાલે એટલે પોતાની ગલી વિશે મૌન રહેશે પણ બાજુવાળી ગલીને ગાળ આપવા પોતાની કહેશે . આ બધું માટે સિંહ જેવી વીરતા નહિ પણ એકદમ સોચી-સમજી (શિયાળ) જેવી ચાલાકી અપનાવતા હોય છે, અને આવા તત્ત્વોને હવે મોટાભાગના ઓળખી ગયા છે એ એમને પણ જાણ થઇ ગઈ છે એટલે સ્ટ્રેટેજી (આમ એ જ પણ આમ) ચેન્જ કરતા રહેતા હોય છે.

    Liked by 2 people

  8. તમારી ઘણીખરી વાતો સાથે હું સહમત છું પણ તમે જે કહી તે આંધાધૂંધી ટાળવા માટે વિકાસ સાથે આપણામાં સ્વયં શિસ્ત લાવવી ઘટે, જેનો આપણાં લોકોમાં મહદઅંશે અભાવ છે, આપના દેશના કોઈ પણ મોટા શહેરના ટ્રાફિક સિગ્નલ વિનાના ચાર રસ્તા પર આનું ઉદાહરણ રોજે રોજ, કેટલીય વાર જોવા મળે.. આ ગુણ શીખવવાથી નહીં આવે દરેકે તેને અંદરથી જ ઉછેરવો પડશે અને પછીની પેઢી સુધી પણ પહોંચાડવો પડશે.. બીજા ઘણા ક્ષેત્રોમાં સ્વયં શિસ્તની જરૂર છે..

    હું માનું છું કે તમે આની સાથે સહમત થશો.. આ વાસ્તવિકતા સામે આંખ મીંચામણાં ના કરી શકાય

    Like

    • અશોકભાઈ જાની,
      પ્રતિભાવ બદલ આભાર
      આપ લેખનું હાર્દ કદાચ સમજ્યા નથી એટલે કે લેખનો મુખ્ય મુદ્દો અલગ છે, આપ લેખની બધી કમેન્ટ વાંચશો કે મારા બીજા લેખ પણ વાંચશો તો આપને ખ્યાલ આવશે કે તેમાં આપે જણાવી તે અભાવ કે ભારત વિષે ની ક્ષતિઓ વિષે કે વાસ્તવિકતા વિષે આંખ મિચામણા ના કરવા અંગે ઉલ્લેખ છે જ. મોટાભાગે દરેક કમેન્ટમાં પણ તે વાત નો સ્વીકાર છે.

      અભાવ છે તેને સુધારવાની જ વાત દરેક માને છે, પણ દરેક મુદ્દામાં ભારત અને ભારતીયને ઉતારી પડવાની અને હલકા ચિતરવાની માનિસકતા વિષે આ લેખ છે

      Like

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out /  બદલો )

Google photo

You are commenting using your Google account. Log Out /  બદલો )

Twitter picture

You are commenting using your Twitter account. Log Out /  બદલો )

Facebook photo

You are commenting using your Facebook account. Log Out /  બદલો )

Connecting to %s